Treoirleabhar an tSíobaire don Réaltra (Douglas Adams)

Cur síos

Aistriúchán Risteáird Mhic Annraoi ar b’fhéidir an leabhar is cáiliúla le Douglas Adams.

Ní gan chúis atá iomrá ar Treoirleabhar an tStobaire don Réaltra ó foilsíodh é den chéad uair i 1979. Déanann an scéal nasc geana agus cairdis idir a chuid léitheoirí ar dhóigh neamhghnáthach. Tá an leabhar agus a údar Douglas Adams (1952-2001) i dtiúin le ‘spiorad na haoise’. Fear ildánach ileolach le haigne fhíorthreascartha ab ea Adams, féith an ghrinn aige agus ardsamhlaíocht a spreagann doimhinmhachnamh. Ní raibh aon bhreall air i leith ísealchéim an domhain seo againn..

Tús pléascach atá leis an scéal seo. Ní thuigeann a laoch saonta Arthur Dent cad chuige go bhfuil a thigh agus an domhan ar fad le scriosadh chun mórbhóthar spáis a dhéanamh tríd an réaltra. Is cúis mhór ionaidh dó é nuair a theilgtear amach san imigéin é i dteannta a chara Ford Prefect, gan acu ach a dtuáillí agus cóip de Treoirleabhar an tSíobaire don Réaltra. Murach go raibh na focail TOG GO BOG É ar an gclúdach, ní thabharfaí aon aird air.

Ar ámharaí an Réaltra, faigheann siad síob idir-réaltach in am an ghátair. Castar neachanna neamhshaolta orthu ansin, agus feiceann Arthur pláinéid shuntasacha nár chuimhnigh sé riamh a bheith ann. Buaicphointe an scéil is ea an radharc ar an ríomhaire atá i ngleic leis an gCeist Dheiridh i dtaobh na Beatha, na hOllchruinne agus Uile. Is beag súil atá ag éinne leis an bhfreagra a thugann sé uirthi!

Tá an leabhar aistrithe go Gaeilge anseo ag Risteárd Mac Annraoi. Tá a leagan de leabhar eile le Douglas Adams, Dirk Gently agus a Ghníomhaireacht Bhleachtaireachta Iomlánatoch, ar fáil freisin.

Clúdach le Mark Wickham