Iad Seo Nach bhFaca

An Ghaeltacht sa lá atá inniu ann, más ea, agus tá Aibhistín ag obair go sona sásta, má tá, don Roinn Fíoruisce agus Drochthailte. Lena hais sin tá a chomrádaí scoile Cuimín, nár fhág an baile ná an fheilm ariamh, agus nach mórán fáilte atá aige roimh na hathruithe atá ag titim amach thart timpeall air. Úrscéal domhain, machnamhach é seo ina bpléitear na nithe is mó is cás do mhuintir na Gaeltachta san aonú aois is fiche: an Ghaeltacht á tarraingt isteach sa nua-aois, toil na ndaoine nó a héagmais, an t-athrú teanga, agus tréigean an chreidimh agus na heaglaise. Agus, ar ndóigh, an cheist mhór a eascraíonn as seo uilig: céard a thiocfas ina n-áit?